नेपाली हास्यव्यङ्ग्य अनलाइन पत्रिका

नवराज कार्की :

१.
भन्छन् भन्न त “ पैसाले खुशी किन्न सकिन्न
तर के गर्नु, खुशी हुन पनि, पैसा नभै हुन्न
खुशी बेचेर पैसा किन्छन्, पैसा तिरेर खुशी
पैसा ठूलो हो कि खुशी ठूलो हो ? भन्न सकिन्न ।

२.
एउटै आमाको सन्तान एउटा गोरु बनेर जोत्दैछ
अर्को चाहिँ साँढे हुनाले, गम्भीर बनेर सोच्दैछ
दाइँ गोरु पो ! निःसन्तान छ र, आनन्दै छ उसलाई
सरकारले नै मेरा सन्तान कति छन् ? भनेर- खोज्दैछ ।

३.
भोको जुको जब तिघ्रामा आरोहण हुन्छ
मानौँ उसको त्यहाँ साँच्चै राज्यारोहण हुन्छ
मामुली पीठो त, चास्नीमा चुर्लुम्म डुबेपछि
रस दोहन हुन्छ र मीठो लालमोहन बन्छ ।

४.
डाक्टरले “मान्छे मरणशील छ तर यो रोगी अहिल्यै नमरोस्” भन्छ
वकिलले “यो मान्छेले जितोस् या हारोस् तर मुद्धा चैँ जहिल्यै गरोस्” भन्छ
साह्रै सकारात्मक सोचको धनी त, त्यो बीमा- कम्पनी पो रै’छ
उसले चैँ “यसको यो रकम तिर्न, कहिल्यै नपरोस्” भन्छ ।

०००
अमेरिका