नेपाली हास्यव्यङ्ग्य अनलाइन पत्रिका

ज्युँदाहरू मरेको नाटक गर्छन्
मुर्दाहरू तान्डव नाचेका छन्
चलाखहरू चाकरीमा ब्यस्त छन्
एक हुल मुर्खहरूले गद्दी हाँकेका छन् ।

अन्त बुद्धिजीबी खबरदारी गर्छ
यता कलो कुरेर ढोकामा बस्छ
एउटा मुर्ख माला पहिरेर सिंहदरवार पस्छ
पहिलो दस्तखतमै दुईचार करोड डस्छ ।

अन्त संसदमा कानून बन्छ
यता गाँजा र धतुरो फल्छ
त्यसैले त भोक बढि लाग्छ
बिकाशको बिटो सबै पेटमै हाल्छ ।

नपत्याए यिनका पेट हेर्नुस्
सबैका दुई मिटर लत्रेका हुन्छन्
ज्वाईं जेठान सासू ससुरा साली जेठानी
सबैका बैंक एकाउन्ट फक्रेका हुन्छन् ।

एउटा पटमुर्ख राजा बन्छ
अरिंगालहरू रक्षा गर्छन्
यी कपुतहरूको लामै लाइन छ
भन्देऊ न प्रभु यी सबै कहिले मर्छन् ?

ए बोल हो ज्युँदाहरू हो
सकेसम्म यिनीहरू
आमालाई नै बेच्छन्
तिमीलाई नै कुनै दिन
मुगलानतिर खेद्छन् ।

त्यसैले त म भन्छु
ज्युँदाहरू मरेका छन्
मुर्दाहरू तान्डव नाचेका छन्
चलाखहरू जुताको तलुवा चाट्छन्
मुर्खहरू राक्षसी हांँसो हाँसेका छन् ।

अस्ट्रेलिया