श्याम पाण्डेहरफहरू
हे हरफहरू किन पढ्दैनौ उनका चिठीहरू जसले पार्सलमा पठाएको पोते र चुरा हात नपर्दै आफै बाकसमा उडेका छन् ।
हे हरफहरू
किन अट्दैनन तिम्रो चौकसमा
ति टारी, बारी र मझेरीहरू
जो जोतीन र पोतिन हली कुरेका छन ।
बोल हरफहरू
किन अट्दैनन् तिम्रो चौकसमा
चाउरिएका गाला र फुटेका पैताला
जिउनलाइ जो घरी घरी मरेका छन् ।
जबाफ देउ हरफहरू
किन बोल्दैनन् बिलौना बनी
नसुन्ने कानका र नदेख्ने आँखाका
जस्ले मर्नको लागि मलामी कुरेका छन् ।
हे हरफहरू
किन पढ्दैनौ उनका चिठीहरू
जसले पार्सलमा पठाएको पोते र चुरा
हात नपर्दै आफै बाकसमा उडेका छन् ।
हे हरफहरू
किन पढ्दैनौ ती अधबैशे मनहरू
जो बेच्छन् अङ्ग र यौनाङ्ग
र त हजारौंका भोक पुरेका छन् ।
हे हरफहरू
तिमी मात्र सुन्छौ र लेख्छौ किन
किनिएको मसिले लेखेको कथा
जो कलमहरू पैसाले पुरेका छन् ।
डार्बिन, अष्ट्रेलिया
Subscribe
Login
0 Comments
Oldest
