नेपाली हास्यव्यङ्ग्य अनलाइन पत्रिका

श्याम पाण्डे :

आकाश र बादलको
आबेगलाई बोकेर
धर्ति फुटाउंला झै गरि
दम्भ बोकेर वर्षिने असिना
छिनभरमै पानी हुन्छ
उसलाई जित्यो भन्नु कि हार्‍यो भन्नु ?
पहरा र झुपडीहरू
बगांउदैं उर्लिएको खहरे
तल समथर बगरमा
आफैले बगाएका
ढुंगाहरूले छेकेको बाँधमा मत्थर हुन्छ
खहरेले जित्यो भनु या हार्‍यो भन्नु ?
पातले टिपेको
सानो आगोको झिल्को
एकैछिनमा संसार जलाउने दम्भ बोकेर
सिरानमा पुग्दा नपुग्दै
पानी भेटेपछि सेलाउँछ र बिलाउँछ
आगोले जित्यो भनु या हार्‍यौ भन्नु ?
जितेर अबिरले
राताम्य अनुहारले ऐनासँग हार्छ
हिउँलाई जितेर उचाइ नाप्नेलाई
ओर्लिंदा ओर्लिँदै हिँउले नै मार्छ
बस ! जितले स्वर गर्छ, दम्भ सिकाउँछ
एक दिन एउटा हार बनेर पिठ्युँ हिर्काउँछ ।

०००
अस्ट्रेलिया