नेपाली हास्यव्यङ्ग्य अनलाइन पत्रिका

वहाँकी बुहारीले नाति पाओस् कि
यहाँको छोराले रडाको मच्चाओस्
म अब अमेरिका आउँदिन
समुन्द्रपारिको सपना सजाउँदिन
सुनिस् !
अमेरिका नै यहिं आउँदै छ रे
काँधभरी नोट बोकेर ल्याउँदै छ रे
म अब अमेरिका आउँदिन भैरे !

अस्ति पनि एम्बेसीमा धेरै बेर रोएँ
नजन्मिएको तेरो नानीको थाङ्ना
कल्पनामा धोएँ
म अब यसरी रुने छैन
भिसाको लागि बेचैन हुने छैन
यहाँको बाटो पनि अब चिल्लो बन्छ रे
यहाँको नातिले पनि
जन्मदै अङ्ग्रेजी भन्छ रे
सपनाको जहाज चढेर
निन्द्रामै बर्बराउँने छैन
सुनिस् !
अरबौं नोटको बजार लाउँदै छ रे
अमेरिका नै यहिं आउँदै छ रे !

तल्ला घरे र माथ्ला घरेको अगाडि कम्जोर बन्दा
चेन्नइ र गोन्जाओको कथा भन्दा
मेलबर्न सिङ्गापुर र टोकियोको गीत गाउँदा
लण्डनको नाना तमास सुनाउँदा
मैले पनि तँलाई धेरै बेर सम्झें
तैंले पनि कैले नानी पाउँछस्
हामी बूढाबूढी दुबैलाई बोलाउँछस्
हामी पनि अमेरिका जान पाउँला
छाती खोलेर चोकमा कथा सुनाउँला
भन्ने थियो नि इरादा भैरे !
तर आज सुनें
सरकारले त अमेरिका यहिं बोलाउँदै छ रे
बोराभरि पैसा बोकेर
अमेरिका नै यहिं आउँदै छ रे ।

उमेरमा त मैले पनि
गतिलै सपना सजाएको थिएँ
ड्रम अर्केष्ट्रा र किबोर्डमा
राष्ट्रबादी गीत गाएको थिएँ
अरुकै क्यारीकेचरमा कलाकार बनेको थिएँ
नौटङ्गी र थिएटरमा जोकर भै जमेको थिएँ
जब तेरो पालो आयो
अङ्ग्रेजीले कठालो समायो
आवश्यकताले डेरा जमायो
भोगले अभाब कमायो
विदेशी स्वप्नाको तीर्खाले घाँटी खायो
तेरो अम्रिकाने भिसा आयो
मलाई स्वदेशी र तँलाई विदेशी बनायो
हो भैरे हो
यहाँ यस्तो दिन आयो ।

तर भैरे
तैंले मलाई अम्रिका बोलाउँनुभन्दा पैले
मस्ती चान्स र चैन (एम्.सी.सी) आउँदै छ रे
यहिंलाई नै स्वर्ग बनाउँदै छ रे
म अब अमेरिका आउँदिन भैरे !

गौरादह, झापा