नेपाली हास्यव्यङ्ग्य अनलाइन पत्रिका

बिचारमा प्रगतिवादी
ब्यवहारमा सामन्तवादी
चरित्रमा पूँजीवादी
नीतिमा नेतावादी
को हुँ म ?

घामले तातेको
दक्खिनी हावाले मातेको
आफ्नालाई विदेश पढ्न पठाइ
यहाँ दुनियाँलाई आन्दोलनमा उठाइ
स्वार्थको चटनी चाटेको
गुटको प्रतिध्वनि बोकेर, नेता पथको गीत गाउँने
भौतिकवादी जुत्ता टेकेर, अध्यात्म मन्दिर धाउने
को हुँ म ?

नारामा राष्ट्रवादी
स्वार्थमा परराष्ट्रवादी
स्वदेशी लगानीको विरोध गर्छु घोर
मेरा मित्र, दलाल कमिशनखोर
को हुँ म ?

सत्तामा घुमेको
मालामा झुमेको
सस्तो जिब्रे बोली
महङ्गो जीवन शैली
विदेशीको लोली
ठेकेदारको लुटमा रमेको
युरोपियन सुटमा जमेको
को हुँ म ?

पश्चिमाको मात लागेको
पूर्वीयाको भात लागेको
इतिहासको घात लागेको
बर्तमानको बात लागेको
को हुँ म ?

गौरादह, झापा