नेपाली हास्यव्यङ्ग्य अनलाइन पत्रिका

कुनै कारण अकारण एउटा सर्वसाधारण नेपाली मरेछ
स्वर्ग जाँदा उहाँ पनि ‘मासचेकिङ’मा परेछ
“कहांबाट आइस् ?”
‘नेपालबाट ।’
“के के ल्याइस् ?”
‘खालि हात छु ।’
सोध्न थालेछन् उल्लाई टाउको हल्लाई हल्लाई
“कुनै काण्ड गरिस् कि गरिनस् ?“
’गरिन’ भनेछ
“कहिल्यै अख्तियारमा परिस् कि परिनस् ?”
’परिन’ भनेछ
’कहिल्यै बोर्डिङमा पढिस् कि पढिनस् ?”
‘पढिन’ भनेछ
“कहिल्यै चुनाव लडिस् कि लडिनस् ?”
’लडिन’ भनेछ
“जापान, कोरियातिर छिरिस् कि छिरिनस् ?”
’छिरिन’ भनेछ
“कहिल्यै बन्दुक भिरिस कि भिरिनस् ?”
’भिरिन’ भनेछ,
“कहिल्यै मोमो खाइस् कि खाइनस् ?”
’खाइन’ भनेछ
“झोलामा चाउचाउ ल्याइस् कि ल्याइनस् ?”
’ल्याइन’ भनेछ
“कहिल्यै कविता लेखिस् कि लेखिनस् ?”
’लेखिन’ भनेछ
“बन्दुक बोक्नेलाई देखिस् कि देखिनस् ?”
‘देखिन’ भनेछ,
“कहिल्यै मधेश झरिस् कि भरिनस् ?”
‘झरिन’ भनेछ
“कहिल्यै डेरा सरिस कि सरिनस् ?”
’सरिन’ भनेछ,
“त्यसो भए तँ अब मरिनस्” भनेछ ।

‘फित्कौली’ अङ्क, २, असोज ०६२