नेपाली हास्यव्यङ्ग्य अनलाइन पत्रिका

साइँला दाइ यो भ्यु टावर भनेको के हो ?
-खडेरीमा उद्योग लागेर
स्वर्गतिर हेर्दा जे देखिनेछ
त्यो भ्यु टावर हो ।

-साउन भदौको बाढीमा
हरेक साल जसरी हामी बगेको
हाम्रा चौपाया बगेको
हाम्रो घर बगेको
हाम्रो खेतवारी बगेको
सबै बगेको
नेताले बडो आनन्दपूर्बक हेर्न
बनाइएको संरचना
हो भ्यु टावर ।

भ्यु टावरको महत्व
यत्तिमा सकिने छैन, कान्छा
भ्यु टावरबाट
हेर्ने छ सरकार
तिमी प्रदेश लागेको
तिम्रा नानीहरू
चौरमा बसेर पढेको
भ्युटावरबाटै देखिने छ
हाम्रा आमा बुवाको
आडमा सलानपानी चडिरहेको ।

अनि हरेक वर्ष आएर नेता
त्यै भ्यु टावरमै उभिएर
आफ्नो गुप्ताङ्ग कन्याउँदै
सुनाउने छ
कुनै जोक ।

लम्कीचुहा, कैलाली