नेपाली हास्यव्यङ्ग्य अनलाइन पत्रिका

सिंहदरबार बाँड्दिन्छन् बाँड्दछन् सपनाहरू ।
मोज बाँड्ने कुरा गर्छन् के के बाँड्छन् अझै अरु ।।
उफ्रिन्छन् मस्त भै नेता नाच्नमा यी सिपालु छन् ।
गल्लीमा टोलमा नेता घरकै पनि ठालु छन् ।।
(१)

बार्दैनन् खानमा ढुक्क जे जे मिल्छ पचाउँछन् ।
दूरदृष्टि हुने यिनको पुस्तौंपुस्ता बचाउँछन् ।।
निरोगी स्वस्थ भै बाँच्छन् सधैँ यी खानपानमा ।
जोसिला फुर्तिला नेता देखिन्छन् यी बथानमा ।।
(२)

दिगो सम्बन्धका हुन्छन् दृष्टि दिन्छन् सबैतिर ।
मान्छेमा मात्र हैनन् यी सबैका दोस्त आखिर ।।
यिनैले मित्रता बाँड्छन् जुका, जुम्राहरूसँग ।
उफ्रिने उपियाँसँगै नमानीकन क्यै धक ।।
(३)

अरु रोएर के हुन्छ सधैँ यी हँसिला हुने ।
मुटुका बलिया साँच्चै न कैल्यै दुःखमा रुने ।।
न कैल्यै डरमा बस्छन् सिपालु डनवादमा ।
गरिबी छैन नि यिनको मस्त छन् धनवादमा ।।
(४)

खाऊ खाऊ अझै खाऊ आफ्नै हो डर के छ र ?
कार्यकर्ताहरू जो छन् यिनैको आरती गर ।।
सिठी बोकेर मुस्काऊ ठटाऊ हातले अरु ।
नराम्रा शब्दमा हैन प्यारले बोल क्यै बरु ।।
(५)

ए नेता ! देशका शान सकेको बाँडिद्यौ धन ।
भेटमा भोटको खेती नोटमै किन ती जन ।।
यता नाङ्गै उता नाङ्गै उदाङ्गै हिँडिद्यौ तर ।
जत्ति कालो रहोस् भित्र चेहरा पार सुन्दर ।।
(६)

डोटी
(गोकर्णेश्वर न.पा.ले ०७८ चैत १८ गते आयोजना गरेको बृहत् हास्यव्यङ्ग्य कविता प्रतियोगितामा प्रस्तु ।)