नेपाली हास्यव्यङ्ग्य अनलाइन पत्रिका

देशमा चुनाव आउन थाल्यो सायद
नेताहरुले फेरि सुुशासन र समृद्धिका
नारा लाउन थाले
मान्छे खोजी खोजी ठेगाना सोधी सोधी
घर घरमै आउन थाले

एकदिन एउटा नेता आउंँछ
आफ्नै सुरमा बाँसुरी बजाउंँछ
र,आफू सरकारमा गए
देशले कोल्टे फेर्ने बाचा गर्छ
नेताको बाचा न हो, के भर छ
कोल्टे मात्र फेर्छ कि उत्तानो पर्छ !

अर्को दिन अर्को नेता आउंँछ
आफ्नै धरातल बिर्सेर धाक लाउंँछ
र, आफू सरकारमा गए
बेरोजगारी हटाउथेँ भन्छ
मन पत्याउन तयार छैन
र पनि सोध्न मन छ
बेरोजगारी कि बेरोजगार के हटाउने ?
देशका कलकारखाना त बेचेर सक्यौ
अनि रोजगारीका लागि कुन देशाँ पठाउने ?

अस्ति पनि शान्तसँग बस्न पाइएन
नेताहरूका अभिवादन फर्काएर भ्याइएन
भन्दै थिए, सत्ता साझेदारीमा मजा आएन
पुरै शासन सत्ता खोसेर लिनु पर्‍यो रे
त्यसका लागि जनताले फेरि बलिदान दिनु पर्‍यो रे
अचम्म छ बा !
किन बरम्बार रगत बगाउने मात्र कुरा गर्छन्
यिनीहरूका आफ्ना छोराछोरी नभएर हो
कि पढ्न युरोप अमेरिकातिर गएर हो ?

हिजो पनि उहि पुराना एक हुल अनुहार आए
एक अर्काको पिठ्युँ माडेर सक्दो छारो उडाए
र, आफू सरकारमा गएर
देशलाई सिँगापुर बनाउने कुरा गरे
तर कर्णालीमा झोलुङ्गे पुल बनाउने
र सत्त्तामा रहेर सिनो झैँ नगन्हाउने कुरा कसैले गरेनन्

यस्तै यस्तै अरु, अधिकांंश नेताहरू
जसले बिगतमा सत्तामा रहेर हाम्रा रगत र पसिनामा तर मारे
तर देश र जनताका निमित्त माखो मारेनन्
तिनै नेताहरू आज फेरि भोट माग्न हाम्रो घरमा आउँदैछन्
भन्नोस् न मित्र
म कसलाई भोट दिउँ ?

हेटाैंडा