नेपाली हास्यव्यङ्ग्य अनलाइन पत्रिका

एक सुकेको चाम्रो छाला
वरिपरि पाँच कुकुर र बिराला
यौटा गुरगुर अर्को ङुरङुर
कुनै छ खुरखुर खुर्के चाला ।।१

उसले भेटे यसले तान्ने
यसले छोए उसले हान्ने
सबैथरीको तानातान
जानाजान छ हानाहान ।।२

बीच बसेको कालो कौवा
काका भन्दै गर्दछ हौवा
अलि पर दाउ लगाउँछ गिद्ध
घिनलाग्दो हेर्दै छ असिद्ध ।।३

चङ्खे स्याल घुमेको फनफन
लोभी दाउ छ मन छट्टूपन
खिच्चा कुक्कुर गर्दछ भुकभुक
गर्छ बिरालो लुकेर छुकछुक ।।४

उनीहरूको तानातान
बच्ने भाग्ने हानाहान
अबुझ बनीकन जानाजान
हामी हेर्छौँ खेल समान ।।५

काठमाडौं