नेपाली हास्यव्यङ्ग्य अनलाइन पत्रिका

म नयाँ नोटमा विश्वास गर्छु
म कालो कोटमा विश्वास गर्छु
मेरा भेडा बाख्राहरुले हाल्ने
म एक भोटमा विश्वास गर्छु ।

पहिला पनि सजिलै जितेकै हो
बिना विकास पाँच वर्षे समय
ढुङ्गा मुढा नारामै बितेको हो
विदेशीलाई मित्रु देख्ने मै हुँ
स्देशीलाई शत्रु देख्ने मै हुँ
युवा जति विदेश खेद्ने मै हुँ
हाम्र साँध सिमाना बेच्ने मै हुँ
म राम्रो मान्छे मनमा लिनोस्
मलाई सबैले भोट दिनाेस् ।

भन्छन मलाई कतिले चटके
म जेलमा जाने आउने पटके
गाउँमा बिजुली काट्ने मै हुँ
हीरासँग पित्तल साट्ने मै हुँ
पानीको मुहान फुटाउने मै हुँ
खानेपानीको धारा टुटाउने मै हुँ
बिकासे खाका लिएर आउँदा
तेसलाई बेस्सरी कुटाउने मै हुँ
मेरो कुरा साराले लिनोस्
मलाई भोट दिनोस् ।

युवा विदेश पठाउने मै हुँ
नगए घोक्रो अँठ्याउने मै हुँ
जताततै भष्टाचार गर्ने मै हुँ
परी आउँदा नमस्कार गर्ने मै हुँ
कालो धन सोलीमा लुकाउने मै हुँ
पाहुनालाई कुकुर फुकाउने मै हुँ
भाइभाइ दिदी बैनी जुधाउने मै हुँ
तिन्कै छातिमा घोडा कुँदाउने मै हुँ
भान्सामा पाइपलाइन ल्याउने मै हुँ
बाली लाग्दा वर्षमा नब्याउने मै हुँ
जनमा महङ्गी  सर्बत्र बढाउने मै हुँ
दूध दिने गाई भीरमा लडाउने मै हुँ
मेरा वृतान्त सबैले मनमा लिनोस्
जसरी पनि मलाई भोट दिनोस् ।

राष्ट्रको ढुकुटी चोर्ने मै हुँ
चोर्न नपाए टाउको फोर्ने मै हुँ
देशका कलकारखाना बेच्ने मै हुँ
विपक्षीको घाँटी रेट्ने मै हुँ
छिमेकीलाई नदीनाला सुम्पिने मै हुँ
देश खाल्टोमा हालेर उम्किने मै हुँ
आफ्नो मासेर विदेशी धर्म हुल्ने मै हुँ
सरकारी खर्चमा सन्सार डुल्ने मै हुँ
चुनावपछि जनताको घाँटी च्याप्ने मै हुँ
सङ्लो पानीमा हिलो छ्याप्ने मै हुँ
तेसैले गम्भीर कुरा मनमा लिनोस्
जसरी हुन्छ मलाई भोट दिनोस् ।

२०७९ बैसाख १३