नेपाली हास्यव्यङ्ग्य अनलाइन पत्रिका

पाडो हो तर भन्नुपर्दछ खसी पाडी भए बङ्गुर
गिठ्टो हो वनको परन्तु अहिले मान्नै पर्‍यो अङ्गुर
हेर्दै चिन्छ फलाम देश दुनियाँ भन्छन् हिरा शासक
अर्काको घर पस्न फोर्न जनता मान्दैन माली धक ।

साना छन् खहरे ठुला नदनदी भन्ने दिँदा तालिम
बढ्दैछन् अपवाद यो मुलुकमा दुर्गन्ध कालोत्तिम
चोर्ने चोरहरू सधैँ मुलुकमा बन्छन् ठुला पण्डित
ढोँगी हुन् सब चिन्दछन् तर तिनै बन्छन् महा मण्डित ।

सत्ताको व्यभिचारभित्र दुनियाँ सिन्की बनी बाँच्दछन्
झारी आँसु सधैँ अझै मुलुकमा गोहीहरू हाँस्दछन्
माग्ने जो सुनको कमन्डलु लिई माग्दै छ भिक्षा सधैँ
टालिन्नन् किन प्वाल छिद्र घरका बढ्दै गए झन् अझै ।

हात्ती हो जिउडाल अङ्ग सबले फेर्दैन सासै तर
बस्छन् स्यालहुँडार ढाडशिरमा यस्तो कतै हुन्छ र ?
हेर्दा गोरु हुँदाहुँदै पनि यहाँ ढुङ्ग्रो लिई बस्दछन्
कल्चौँडै नहुँदा सफेद दुधका सिर्का कहाँ खस्दछन् ?

गालीशास्त्र पढेर गाउँ घरमा हल्ला ठुलो गर्दछन्
पी एच् डी यसमै गरी कति जना शिक्षा यही छर्दछन्
छेपारा खजुरा जुनै दल पुगौँ छन् मस्त झन्डामुनि
सारा साधु महन्त बौद्धिकहरू तड्पेर बाँच्छन् जुनी ।

दमक, झापा