नेपाली हास्यव्यङ्ग्य अनलाइन पत्रिका

म पनि शहर पसेको भए
ठुलै मान्छे बन्थें होला
बडा हाकिमको किचन भित्रै बस्ने
चल्तीफिर्तीको गतिलै भान्छे बन्थें होला ।

लुसुक्क लुसुक्क चोरबिरालो जस्तो
क्याबिनेटको कुनाकुना पसेर
गोप्य योजनाहरू सुन्थें होला
खुसुक्क पर्खालपारिको महाजनकहाँ बसेर
निकै साखिलो हुन्थें होला
अफिसको ढड्डामा अड्डा जमाउँथें होला
सरकारी पर्खालभित्रको नक्सा कोपरेर
माल कमाउँथें होला
म पनि शहर पसेको भए ।

सप्तरङ्गी झल्लरी मञ्चमा चढेर
बहुरुपी नाटक गर्थें होला
कहिले यता कहिले उता
पालैपालो सर्थें होला
कहिले अफिस कहिले निवास
सुँगीसुँगी हिन्थें होला
को भित्रको को बाहिरको
छानीछानी चिन्थें होला ।
म पनि शहर पसेको भए ।

ठुलै मान्छेको आड पाएर
सरकारी अफिस थर्काउँथें होला
गाउँले मान्छेको ढाड थपथपाएर
काम हुन्छ भन्दै फर्काउँथें होला
आफ्नालाई चाइना अमेरिका छिराउँथें होला
नक्कली जग्गा रचना गरेर
सरकारी मुहाब्जा तिराउँथें होला
ब्रिफकेस चिन्थें होला
खोला छिन्थें होला
आश्वासन दिन्थें होला
गाडी किन्थें होला
आफन्त
गाउँ
सबैतिर सन्किन्थें होला
म पनि शहर पसेको भए ।

यसरी शहर पस्नेहरूले
दरबारको वरिपरि बस्नेहरूले
बाक्लो खरानी घस्नेहरूले
राज्यको सम्पति डस्नेहरूले
बर्षौंदेखि
राजनीतिको धमिलो पानीमा माछा मारिरहेछन्
म पनि शहर पसेको भए ……… ?

गौरादह, झापा