नेपाली हास्यव्यङ्ग्य अनलाइन पत्रिका

चोरलाई चौतारो दियौँ साधुलाई सुली
गन्धे काममा रमाउँछन् हाम्रा घर मुली
बेचिखाए भाँडा वर्तन भुँडी भोको हुँदा
अघाएपछि हाँस्ने गर्छन् अरु भोकै रुँदा ।

तिम्रै संसार रमाइलो छ मन लाग्दो गर
बिना स्वादको अरुलाई आफू खान्छौ तर
मेरो राम्रो अरु चाम्रो आफैँ कुबिचारी
आफ्नै घर फोर्छौ सधैँ बन्दै अत्याचारी ।

तारा झार्ने कुरा गर्छौ आफैँ व्यभिचारी
सत्ता शासन पुरा रासन खानका भकारी
हिजोका सडक छापे आज महलका मालिक
आफैँ मपार्इँ स्वघोषित बनाउँछन् शालिक ।

मनै कालो धनै कालो बोली व्यवहार कालो
राजनीतिमा हाम फाली फिंंजाउँछन जालो
भाग्यमानी बन्नु पर्छ कालो जाल बुन्दै
भित्र हल्ला जे जे होस् बाहिर गाली सुन्दै ।

कति राम्रो चलन देशमा जनता नाङ्गो हुने
सेवा भन्दै राजनीतिमा मोटो रकम लिने
गाँस, बास, कपास छैन, छैन मनमा कालो
सेतो मनमा कालो धनको नफिजाउनु जालो ।

उदयपुर