नेपाली हास्यव्यङ्ग्य अनलाइन पत्रिका

ए !! फित्कौली दाइ !
मलाई पनि भ्रष्टाचारी भन्देऊ न !

दाइ !
मलाई पनि भ्रष्टाचारी भन्देऊ न
दुईचार ठूलाबडामा गन्देऊ न ।

आजभोलि कोहि मेरो नाम
चियादोकानमा पनि लिंदैन
समाचारका पृष्टहरूमा पनि
कसैले भाउ दिंदैन
शिखर साँझ रिसोर्टको त कुरै छोडौं
मलाई
सेकुवा कर्नरमा पनि कोहि बोलाउँदैन
पुराण पार्टी र मञ्चहरूमा
अतिथिको बिल्ला पनि लाउँदैन
दाइ ! मलाई पनि दामदार कर्मचारी भन्देऊ न
दुईचार ठूलाबडामा गन्देऊ न ।

नीजि कम्पनीका मालिकले
मलाई नमस्कारमा टेर्दैन
चन्दा दिन नसक्ने लाछीलाई
कोही पार्टीका लिडरले पनि हेर्दैन
थाई सिङ्गापुरको कुरै बेग्लै
तिरुपति जाने कि भनेर कोहि सोध्दैन
विवाह पिक्निक र रात्रीभोजमा
अलिकति खाने कि
भनेर पनि कोहि खोज्दैन
दाइ ! मलाई पनि कालोबजारी भन्देऊ न
दुईचार ठूलाबडामा गन्देऊ न ।

कहिले कतै सालबारीमा
कहिले कतै मालबारीमा
कुरा मिलाउँन कतै कोहि बोलाउँदैन
मेरो निम्ति छद्मभेषी भाकामा
अनसनको धूलो छरेर सोझा आँखामा
नक्कली आदर्शको गीत गाउँदैन
दाइ ! मलाई पनि कामचोर अधिकारी भन्देऊ न
दुईचार ठूलाबडामा गन्देऊ न ।

हो नि दाजु !
कमसेकम भ्रष्टाचारी भए
सबैले चिन्ने थिए
दुनियाँ मेरै इसारामा हिन्ने थिए
कथमकदाचित जेलै परे पनि
सानसाथ बस्ने थिएँ
सम्मान साथ (खादा माला र जुलुस सहित !?) निस्कने थिएँ
पृय दाजु
जनि गरेर मलाई पनि भ्रष्टाचारी भन्देऊ न
दुईचार ठूला मान्छेमा गन्देऊ न ।

गौरादह, झापा