नेपाली हास्यव्यङ्ग्य अनलाइन पत्रिका

जहिले देखि आफ्नैले
कालो कोट लाउनुभयो
अलि अलि गर्दै गर्दे
सबै पो भ्याउनुभयो

लोग्ने स्वास्नीको ठाकठुक
मिलाउनुको सट्टा सुर्याउनुभो
घरायसी कुरो क्रमैले खोतल्दै
डिभोर्ससम्म पो पुर्याउनुभो

ढुक्क परियो विश्वास गरियो
कसरी शङ्का गर्नु आफ्नैलाई
कालो कोटमै दिएको सल्लाह
त्यसलाई कसरी भन्नु र नाइँ

पढाइ लेखाइ हुर्काएको छोरोले
आफ्नै बुवालाई पो मुद्दा दियो
माया गरे झैँ गरि दुहुना गाई
बनाउने उहाँकै चाल थियो

आजभोलि गर्दागर्दै वर्षौँवर्ष
अड्डा अदालत कति धाउनुपर्ने
टुङ्ग्याउलान् कि भनि आस गरि अझै
कालोकोटे उहाँलाई रिझाउनु पर्ने

जग्गा जमिन सम्पति सकिँदैगो
घरभित्रको झगडा ठिक हो कि हैन
घरपरिवार सबै छिन्नभिन्न भो
उहाँको मनमा दयामाया छ कि छैन

के गर्नु पेशा हो भन्दै
फिस बढाउदै केस लम्बाउँदै लानुभो
आफ्नै आफन्तको भाग खोसेर
थाहा छैन खुसीले कसरी खानुभो

छउन्जेल फासलफुसुल पारेर
माया गरे झैँ धाउनुभयो
सबैलाई टाँट पल्टाई दिएपछि
किन हो पर पर हुनुभयो

जहिले देखि आफ्नैले
कालो कोट लाउनुभयो
सुख र खुसी खोसेर
घर परिवारलाई रूवाउनुभयो ।

जुलाई २९, २०२२
लस एन्जेलस