माधव पोखरेल गोज्याङ्ग्रेभतुवालाई बिगौती
पारदर्शी छु भन्छन् सधैँ जिउमा टन्न लुगा हात्तीको झैँ दाँत बुझौँ पाल्छन घरमा सुगा । कस्को घरमा ब्याएको छ गोरु, राँगो, बोको दूध दुहुन पुग्छन तिनै नेता साथमा लिई डोको ।
घुसनीय घुन मन्त्रीका चुसनीय कुरा
आफैँ बोक्सी आफैँ झाक्री देश खाए पुरा ।
राजनीतिको पुच्छर बाङ्गो कुरा काट्ने धेरै
भोलिका दिन पर्खि बस फेला पर्छौ मेरै ।
सोझो कुरा गर्नु हुन्न बाङ्गो खेदने सबै
शरीरभरि कपडा लाउँदा नाङ्गो भन्छन सबै ।
आफ्नो डम्फू बजाउँछु म तिमी झ्याली पिट
ताली मार्ने कता गए हाल्छु अब रिट ।
घुन बनी सुनभित्र पस्ने रहर मेरो
टल्किएर हिड्न मन छ घुम्छु एक फेरो ।
लाज शरम पचाएर जुठो खान बसे
खाँदै थिए हावा आयो छाँगाबाट खसे ।
हलो अड्काई गोरु कुट्ने विज्ञताका नाममा
जालो फाल्छन् अंकुशको जनताका काममा ।
कसो गरी मन्त्री भए यी हलोका फाली
जोत्न पनि जान्दैनन् है गोरुलाई गर्छन गाली ।
आफूमात्र पदमा सधैँ बुर्कुसिदै पुग्ने
विपक्षी नि पदमा पुगे सत्तोसराप गर्ने ।
हेर्ने आँखा कालो होकी भित्री मनै कालो
सबै कालो मिलीभगत फिंजाउँछन जालो ।
पारदर्शी छु भन्छन् सधैँ जिउमा टन्न लुगा
हात्तीको झैँ दाँत बुझौँ पाल्छन घरमा सुगा ।
कस्को घरमा ब्याएको छ गोरु, राँगो, बोको
दूध दुहुन पुग्छन तिनै नेता साथमा लिई डोको ।
गाउँ घरमा सुन्छु कुरा भतुवा आयो रे
गोरु, राँगो, बोकाको दूधको बिगौती खायो रे ।
०००
उदयपुर
Subscribe
Login
0 Comments
Oldest
