नेपाली हास्यव्यङ्ग्य अनलाइन पत्रिका

पार्टीको मुखिया म नै हुँ सबको, हर्ता र कर्ता म नै
मै आधार जरो हुँ फेरि दलको, धर्ता र भर्ता म नै
गाली हर्दम गर्दछन् अघि सरी, मान्छेहरूले किन ?
छोरो उठ्छ चुनावमा, टिकट के पर्दैन मैले दिन ? १

मैले दुःख खपेर आर्जन गरेँ, सर्वोच्चताको पद
खाएँ लौह-चना बनाउन पुगेँ, अत्यन्त ठूलो कद
मेरा मानिस पुग्नु पर्छ पदमा, बुझ्दैन कोही किन ?
सालो उठ्छ चुनावमा, टिकट के पर्दैन मैले दिन ? २

जित्नैपर्छ जसो गरे पनि यहाँ, आसन्न निर्वाचन
चाहे लाग्न पुगोस् कलङ्क अथवा, कालो निलो लाञ्छन
आफ्ना को र परत्र को खबर के पर्दैन मैले लिन ?
भान्जा निम्ति चुनावमा टिकट के पर्दैन मैले दिन ? ३

मेरो जीवन दासतामय बन्यो, स्वामी हुने तालमा
थापेँ दाउ निमित्त भूमि जहिले, पाशा जुवा खालमा
कैले पूर्व गएँ र उत्तर गएँ, कैले गएँ दख्खिन
सम्धी उठ्छ चुनावमा टिकट के पर्दैन मैले दिन ? ४

मेरै मात्र गरेर आश मुखमा, हेर्छन् धुपौरेहरू
कैयौं दीन-दुखी बनेर बिचरा, बस्छन् भरौटेहरू
यी मेरा जन हुन् र हात यिनको, पर्नेछ मैले लिन
मामा निम्ति चुनावमा टिकट के पर्दैन मैले दिन ? ५

०००
भरतपुर, चितवन