नेपाली हास्यव्यङ्ग्य अनलाइन पत्रिका

नो नो नो नट रे अगेन नट रे पाइन्न मौका गयो
भो भो भो सकियो कुकर्म चुलियो तिर्की र चौका गयो
जा जा जा पर जा विकार घर जा, लीला सबै हेरियो
मानी दिक्क हुलुक्क आज हुन गो धोती नयाँ फेरियो

गालीको भरमा बसी शहरमा नौनी घिची रातमा
आफैं हौ अभिशाप पाप करनी नामी भयौ घातमा
छोरी पुत्र कुपुत्र तान्छ जसले सत्ता उही पासमा
सासूको भरिया बनेर करिया खाने मिठो आशमा

आयो मार्ग विचार चार कविजी बिक्ला हरे नोटमा
छाने हुन्छ नयाँ इमान भरको आए सखा भोटमा
धेरै नै कुहियो सखाप चुहियो छानो कठै मासियो
थोत्रा वर्तन यी लगी बगरमा भन्नू हरे भासियो !

खोसे हुन्छ कमाइ आज यिनको चोरेर खानेहरू
नेपाली जनता चिन्निन्छ दनुजा आफन्त लानेहरू
कालो कर्म अधर्म धेर सुनियो नेपाल रोयो अरे
बोले झूट बढी पढी गडबडी सन्ताप होला भरे !

बाटोमा चुहियो बजेट गुरुजी ठेक्का लिने मात्तिने!
सोझा आम तमाम आज विरही एकान्तमा आत्तिने !
लेखेको उहिले अनन्त खुइले सुन्दैन बैरो हरे !
चिच्याए जनता पुगी सडकमा सोझाहरू नै मरे !

०००
चितवन