नेपाली हास्यव्यङ्ग्य अनलाइन पत्रिका

नरहरि बा पहिले पहिले राजनीतिका पछि लाग्नुहुँदैन है भन्ने गर्थे । स्कुल गएका छोराछोरी पनि राजनीतिमा लाग्लान् कि भनेर डराउँथे । उनी सधैँ यो राजनीतिको फोहोरी खेलमा नमुछिनु है भनेर सचेत पनि गराउँथे । यस वर्ष उनको रबैया त्यस्तो छैन । उनी भिन्न रुपले सोच्न र बोल्न थालेका छन् । बाले हिजोआज पाठपूजाका स्तोत्र समेत बदलेका छन् ।

पहिले पहिले रामनाम जप्न र भगवानको आराधना गर्नमा बिहान बेलुका बिताउँथे । राजनीतिको कुरा आउने बित्तिकै नेताहरूले फलानाको नामो निसान मेटाउँछु भनेको सम्झन्थे । अमुकको पत्ता साफ गराउँछु भनेको सुनेर पिरोलिन्थे । ढिस्कानोलाई धुलो चटाउँछु भनेको सुन्दा रिसले मुर्मुरिन्थे । उनका छोराछोरी सानै थिए । असल आनीबानीका कसरी बनाउने भनेर चिन्ता पनि थियो । त्यसैले छोराछोरीसँग— यिनीहरूले यस्तै सिकेका छन्, आफ्नो औकात देखाउँछन् । तिमीहामीले यिनका पछि लाग्नुहुँदैन । त्यस्तो सिक्नुहुँदैन भन्ने गर्थे ।

अब बल्ल राजनीतिमा सुधार भएछ भन्ने उनलाई लागेको छ । हिजोआज छोराछोरीले नेताको भाषण सुनेको थाहा पाउँदा केही भन्न छोडे । हाम्रा नेताहरूले भावी पुस्तालाई सही बाटो देखाउने भएछन् भन्ने लाग्यो । परिपक्व जनता नेताको कुरा मान्छन् । छोराछोरी बाआमाको कुरा विश्वास गर्छन् । नेताले बाआमालाई सिकाउने र बाआमाले छोराछोरीलाई सिकाउने हुँदा पत्ता साफ गर्ने, नामो निसान मेटाउने र धुलो चटाउने काम पक्कै राम्रो होइन । आउँदो पुस्ताले त्यही सिक्छ । यसो भएपछि देश समाज र मानिसको चरित्र नै बिग्रिन्छ भन्ने उनको ठम्याइ थियो ।

यसपटक नेताका भाषणमा उनले फलानाको कन्तबिजोक हुन्छ भन्ने सुनेछन् । सकारात्मक सोच र उपयोगी विचारमा भरोसा राख्ने नरहरिलाई यस कुराले साह्रै खुसी लाग्यो ।

हाम्रा नेताहरू अर्काको कन्तबिजोक हुनेभयो भनेर सार्वजनिक ठाउँमा भाषणमा चिन्ता व्यक्त गर्न थाले । सायद कन्तबिजोकबाट बचाउने चिन्तन गरेका छन् कि जस्तो पनि लाग्यो । किनभने सुध्रिएका नेताले सँगैका साथीलाई कन्तबिजोग हुनबाट बचाउँदा नै देशको अवस्था सुध्रिन्छ भन्ने जान्दछन् होला । अब चाहिँ राजनीति गर्नैपर्छ भन्ने उनको ठम्याइ रहेको छ । उनले बिहानबेलुका राजनीतिको स्तुति गाउन थालेको पनि निकै दिन भयो ।

०००
कपन, काठमाण्डौं