नेपाली हास्यव्यङ्ग्य अनलाइन पत्रिका

म भन्छु
महङ्गीले जनताको ढाड कुप्रि सक्यो
जनताले हातमुख जोर्न नसक्ने अवस्था छ
ऊ भन्छ
पोलियो लाग्यो कि पक्षघात भयो ओखतीले हुँदैन
त्यसैले भक्तिसाथ बोलौं जय सियारामजी कि

म सोध्छु
बेथिती र बिसङ्गती माथि निर्मम प्रहार भएर
सुसंस्कृत र सभ्य समाजको निर्माण कहिले हुन्छ
ऊ भन्छ
थिती, सभ्यता र संस्कृति सुधार्न प्रभुको शरणमा जाउँ
त्यसैले जोडसँग भनौं जय सियारामजी कि

म सम्झाउँछु
जनताको रक्षा, शिक्षा, स्वास्थ्य र रोजगारीको प्रवन्ध
एकमात्र लक्ष्य र कार्यक्षेत्र हुनुपर्दछ
ऊ भन्छ
चराचर जगतको रक्षा र पालनपोषण गर्ने
उनै प्रभुलाइ पुकारौं जय सियारामजी कि

उसका अनुसार
हत्या, व्यभिचार र भ्रष्टाचार – जय सियारामजी कि
निरंकुशता, शोषण र अत्याचार – जय सियारामजी कि
न्याय, नैतिकता र सदाचार – जय सियारामजी कि
माया, ममता र आदरसत्कार – जय सियारामजी कि
सुख, समृद्धि र परिस्कार – जय सियारामजी कि…

(पाठकगण, यसमा प्रस्तुत ऊ को होला ? स्वविवेकमा निणर्य गर्नुहोला । )

०००
गौरादह, झापा
हाल, गोकर्णेश्वर, काठमाडौं