नेपाली हास्यव्यङ्ग्य अनलाइन पत्रिका

परिवर्तनको उत्कट चाहना लिएका
नरनारीहरूको समुन्द्रमा
चम्किलो प्रकाशले सुशोभित
एउटा स्वरूप उभिएको छ
हातमा हल्लाउँदै एप्पलको फोन
बेलाबेलामा नाडीमा बाँधिएको
रोलेक्स घडितर्फ नजर लगाउँछ
र
हिराजडित स्वणर् औंठि लगाएको साहिँली औंलाले
बेन्टले प्लाटिनम चस्मा मिलाउँछ

चस्मा थामिरहेका उसका दुबै कानमा
पिङ्ग खेलिरहेका छन्
दुई थान तोले मुन्द्रीहरू
उसको भाषणको सुरमा सुर मिलाउँदै
रम्भाले भन्दा उम्दा तालमा
नाचिरहेका मुन्द्रीहरूसँग ताल मिलाउन
सकस परेको छ एकथान कण्ठ स्वणर् सिक्रीलाई

कण्ठ सिक्रीको दुःखमा दुःख मिलाउँदै
जर्मन लेदर ज्याकेटको पकेटभित्र
गुम्सिरहेको ल्याण्डरोभर कारको साँचो
बेलाबेलामा बिद्रोह गर्दै सहयोगको याचना गर्दछ
खुट्टाले थिचिएका एकथान इटालियन ब्राण्डका जुत्तासँग
जो आफै हिनताबोधले लज्जित भएर हारेका छन्
शिरमा सुशोभित भ्यालेन्टिनो ब्राण्डको ह्याटसँग

शीरको ह्याट ड्यासमा राखेर
ओजपूर्ण आवाजमा
सम्पूर्ण नरनारीमा उत्साह र नवीन उर्जा प्रवाह गर्दै
पूँजीवाद, विस्तारवाद र साम्राज्यवादको विरूद्ध
विगुल फुक्दै युद्धको
गरीब, निमुखा र पिछडिएका वर्गको मुक्तिका लागि
आफ्नो वलिदानीको संकल्प गर्दछ
पूँजी वजारको नव शक्तिशाली खेलाडी
अर्थात,
समाजवादी ठिटो ।

०००
गोकर्णेश्वर, काठमाडौं