उत्तमकृष्ण मजगैयाँऊ अर्कै भइसकेछ
कलेटी परेको ओठ चाट्तै थोत्रो चप्पल पड्काउँदै सन्देश बोकी गाउँगाउँको बाटो काट्ने त्यो साथी, गाउँमै छुटेछ कि क्या हो ? त्यसैले उसलाई खोज्न म फेरि यतै फर्केर आएँ शक्तिले सिद्धान्तलाई डसेछ ।
हो बाबु ! राजधानीमा मैले
उसलाई देखेर आएँ
ठम्याउन धौधौ भयो
विधिनिर्माता भएपछि उसमा
धेरै फरक आइसकेछ, ऊ अर्कै भइसकेछ ।
थकित अनुहारको त्यो झुस्स दाह्री
फ्रेन्च कटमा बदलिइसकेछ
फाँसी चढ्न तयार गर्धनमा
टाईको गाँठो कसिइसकेछ
अब टन्न मोटाएर
निकै चिल्लो भइसकेछ
सुकिलो पोसाकमा ठाँटिएर
चिन्नै नसकिने भएछ
ऊ अर्कै भइसकेछ ।
गजब भयो
उसले पनि मलाई पटक्कै चिनेन
आफ्नो बैठक कोठामा उसले
घन्टौं कुरायो, भेटै दिएन
फुत्त निस्कियो, मोटर चढ्यो
कता हरायो, फिर्दै फिरेन
भेट्ने आसमा बसेको म
ऊ त विदेश पो गइसकेछ
ऊ अर्कै भइसकेछ ।
थाहा पाएँ उसका केही
काण्डहरू घटिसकेछन्
सात कुल तार्ने मौका यही हो
अन्तरचक्षु खुलिसकेछन्
उसका आफन्तहरूले समेत
मनग्गे पौडी खेलिसकेछन्
बङ्गला पनि किन्यो रे अब त
उसको गरिबी गइसकेछ
ऊ अर्कै भइसकेछ ।
कलेटी परेको ओठ चाट्तै
थोत्रो चप्पल पड्काउँदै
सन्देश बोकी गाउँगाउँको
बाटो काट्ने त्यो साथी,
गाउँमै छुटेछ कि क्या हो ?
त्यसैले उसलाई खोज्न म
फेरि यतै फर्केर आएँ
शक्तिले सिद्धान्तलाई डसेछ त्यहाँ
त सबै परिवर्तन भइसकेछ
ऊ अर्कै भइसकेछ ।
०००
दाङ
‘जय अवसरवाद’ (२०५४)
Subscribe
Login
0 Comments
Oldest
