नेपाली हास्यव्यङ्ग्य अनलाइन पत्रिका

अनुदान नलिने महान् नेता
ऋण पनि नलिने त्यागी नेता
विकास बजेट कुम्ल्याउँदै,
चुनाव लड्ने देशभक्त नेता !!

खै तिमीलाई कसरी संबोधन गर्रौ ?
कोही भ्रष्टाचारी भन्छन्
कोही दुराचारी भन्छन्
कोही व्यभिचारी भन्छन्
जेहोस् तिम्रो आफ्नो पहिचान छ ।

तिमी जेसुकै गर त्यो तिम्रो पेसा हो,
तर अब युवा विदेशमा नबेच
वृद्धआश्रम हैन, वृद्धपार्क बनाऊ
व्यापार, वाणिज्यमा वृद्धि गर
मानवीय र प्राकृतिक श्रोत
साधनको सदुपयोग गर ।

आमाका आँसु पुछ्न सिक
प्रियाको सिउँदो भर्न सिक
बच्चाको हातमा कलम दिएर
बाको ओठमा मुस्कान भर्न सिक ।

काला पत्थरमा बन्दुक बोकेर
देशको सिमा जोगाउने
ती सच्चा देशभक्तका लागि !
तराईमा झुलेका सुनका बाला
पहाडमा फलेका मोतीका दाना
अब तिमी आफैले पुर्‍याउन पर्छ
अनि त तिमी ! सच्चा नेता बन्छौ !
साँच्चै तिमी सच्चा नेता बन्छौ ।।

०००
रातोपुल