नेपाली हास्यव्यङ्ग्य अनलाइन पत्रिका

काँचुलीझैं वस्त्र लाउँछ्यौ शरीरलाई बेरी,
खानेकुरा रुचाउँछ्यौ मोमो चाउमिन जेरी ।
अनुहार हेर्दा सुलिखुत्ते सिन्का जस्ता हात
आकाश पाताल जोडीजोडी गर्छ्यौ ठुला बात ॥

स्लिम बन्ने रहरमा सुके तिम्रा गाला,
सोह्र बर्षे जवानीमै चाउरी परे गाला ।
बुढी आमै पनि आजकल कुर्ता सुर्वाल लाउँछिन,
असी बर्षे उमेरमा ब्युटीपार्लर धाउँछिन ॥

नानाभाँती पोसाकमा जीउ सजाउन,
थाल्यौ तिमी कोहीदेखी छाड्यौ लजाउन ।
बीस से.मी. कपडाले सबै जीउ ढाक्छ्््यौ,
साँझपख भएपछि होटलतिर लाग्छ्यौ ॥

विदेशीको संस्कृतिले नेपाल छोप्यो सारा,
यसरी नै बिग्रँदै छ हाम्रो परम्परा ।
संस्कृति र परम्परा हराएर गयो,
नेपालीको जाति पक्का लोप हुने भयो ॥

नेपालीको परम्परा बचाउने काम,
गरेमात्र संसारभरी चल्छ हाम्रो नाम ।
नत्र भने सारङ्गी र मादल धुरुधुरु,
रुँदै बस्छन् म्युजियममा के भन्नू र अरु !!

०००
धुलाबारी, झापा
मोबाइल -९८४२७१५१५३२