नेपाली हास्यव्यङ्ग्य अनलाइन पत्रिका

१.
लेख्दै गरेँ मैले र मेट्नेहरूले मेटेर गए
जोकर बनाए तासको गड्डीझैँ फेटेर गए
जो नजिक थिए सबैभन्दा आखिर उनैले
आलिङ्गनको बहाना पारी घाँटी रेटेर गए ।

२.
बिग्रिएको ताल्चा न त बन्द हुन्छ न खुल्छ
ओइलिएको फूलमा न भमरो न मौरी डुल्छ
जत्ति खनजोत गर्नुस् जत्ति मलजल हाल्नुस्
ढुङ्गो आखिर ढुङ्गो न हो न टुसाउँछ न फुल्छ ।

३.
एकाबिहानै कतैबाट मृत्युको सन्देश आए जस्तो
निल्न भनेर अजिङ्गरले यामानको मुख बाए जस्तो
सधै सन्त्रासमा बाँच्नुपर्ने नियति नेपालीको हेर्नुस् न
कुखुराका ओथाराहरूमा चीलले कावा खाए जस्तो ।

४.
आफैले लगाएको बेर्ना आफै गिँड्न मिल्दैन
बिगार गरे भन्दैमा बच्चासँग भिड्न मिल्दैन
अझै कति निर्लज्ज बन्छस् थुइक्क राजनीति
नाङ्गै जन्मेको हो भन्दैमा नाङ्गै हिँड्न मिल्दैन ।

५.
औषधिको लेवलमा विषको पुरिया के भएको हो
भर्खरकै फर्निचरमा लागेछ धुलिया के भएको हो
हेर्दा युरोपियन अमेरिकन चाइनिज इण्डियन जस्तै
दुरुस्तै देखिन्छ सिंहदरबारको हुलिया के भएको हो ?

०००