नेपाली हास्यव्यङ्ग्य अनलाइन पत्रिका

मन्त्रीको पदबाट खुस्किए पछि !
नेता ज्यूबाट पत्रकार सम्मेल्न सम्पन्न भयो !

मन्त्री हुँदा उत्कृष्ट काम गरेकोमा !
नेताज्यूले छाती फुलाए !
आफूले गरेको उत्कृष्ट, कामहरूको !
फेहरिस्ता सुनाए !

हेलिकप्टरबाट बाढी पीडितहरूको
अवलोकन गरेंं !

राहतका लागि केही पोका चाउचाउ र चिउरा
हेलिकप्टरबाटै खसालें !

मोटरको लस्कर लगाएर, गृह जिल्ला पुगें !
खादा, माला लगाएँ !
विकासको मूल फुटाउने कसम खाएँ !

केही थान आफन्तहरूलाई, सल्लाहकार मनोनित गरें !
उनीहरूको निम्ति मोटर र भत्ताको व्यवस्था गरें !

श्रीमती र छोराछोरीको प्रयोजनका लागि
दुई,चार मटरगाडी मन्त्रालयबाट जोहो गरें !

मन्त्रालयमा, कर्मचारी र ठेकदारहरू बीच
सेटिङ्ग मिलाएँ !

सेटिङ्गमा नमिल्ने कर्मचारीहरूको लिस्ट बनाउन लगाएँ !
र तिनको सरुवा गरिदिएँ !

दात्री निकायका मान्छेहरूलाई भेटेर
विदेश भ्रमणको चाजोपाँजो मिलाएँ !
दुई चार जना कार्यकर्ताको जागिरको कुरा मिलाएर !

केही पत्रकारहरूलाई अन्तरवार्ता दिएँ !

मन्त्रालयको भित्तामा आफ्नो फोटो टाँस्न लगाएँ !

आफू बस्ने मन्त्रीक्वाटर लाखौं खर्च गरेर सजाएँ, सिंगारें !
त्यै मेसोमा आफ्नो घरको मर्मत र सामानहरूको जोहो गरें !

दिनै जसो बढे नेताज्यूको महलमा हाजिर लगाएँ !
बिरोधीहरूको कुरा लगाएँ !

वाचाल मन्त्रीज्यूको,
प्रगति विवरण सुनेर, पत्रकारहरू दङ्ग परे !
तर !
कमिसन वापत कति पैसा थुप्रियो ?
कुन कुन सरकारी जमिन
छोराहरूको नाउँमा पास गरियो ?
कुन कुन होटेल, स्कुल र अस्पतालमा लगानी गरियो ?
एअरपोर्टबाट कति किलो सुन घर भित्रियो ?
राजदूत र हाकिम छान्दा कति कमिसन आयो ?

यी विषयहरूमा,
न त पत्रकारहरूले सोधे !
न त पत्रिकामा छापियो !

०००
गोरखा