नेपाली हास्यव्यङ्ग्य अनलाइन पत्रिका

कालो मैलो आयो ढाक्यो जालो लायो धोका हो
आलाकाँचा गुण्डा डाक्यो सत्ताधारी पोका हो
मुर्दा जस्ता मान्छे आए हावादारी नारा हो
दानापानी खायो नाच्यो मात्यो कस्को घोडा हो ।१

कालापानी धर्ती बेच्ने पार्टी कस्को पेवा हो
नालापानी सुम्पेकाछन् नेपालीको खेवा हो
अर्काको नै हावा लाग्यो ढोग्ने पुज्ने सेवा हो
दानापानी खायो नाच्यो मात्यो कस्को घोडा हो ।२

पाखा सारा बाँझा पार्दै मान्छे बेच्ने सत्ता हो
पानी खानी सुख्खा पार्ने लुट्ने खाने भत्ता हो
आफ्नो पोल्ने अर्को पोस्ने झालेमाले कुत्ता हो
दानापानी खायो नाच्यो मात्यो कस्को घोडा हो ।३

नारा लाग्छन् कस्ता कस्ता काँढा खोज्ने धस्ने हो
दाह्रा धस्दै उल्का पार्ने तारा झार्ने भन्ने हो
कस्को पारा कस्तो होला देख्ने जान्ने आफै हो
दानापानी खायो नाच्यो मात्यो कस्को घोडा हो ।४

दाम्लो बाट्ने पोया के को तोर्सो बाङ्गो पार्ने हो
कुम्लो पार्ने टाढा लाने नन्दी भृङ्गी आफै हो
सीमा मिच्दा बोल्छन् को खै साढे बन्ने ऊ नै हो
दानापानी खायो नाच्यो मात्यो कस्को घोडा हो ।५

हावाखावा पार्दै धुत्ने आमा काट्ने चिर्ने हो
लामाछोटा आरा बोक्ने धामी बोक्सी आफै हो
नाफाखोरी चोरी धन्दा नेता बन्ने पेशा हो
दानापानी खायो नाच्यो मात्यो कस्को घोडा हो ।६

०००
चितवन