देशभक्ति नाराभन्दा माथि- के छ र ?
नीतिगत भ्रष्टाचार मौलाएको छ देश हाँक्ने चालक जो बौलाएको छ सत्ता हाँक्छ नेपथ्यमा साथी बसेर देशभक्ति नाराभन्दा माथि - के छ र ?
देशभित्र बसुन्जेल काम नगर्ने
विदेशमा पुगेपछि जे पनि गर्ने
यस्ता युवा भएपछि देश बन्छ र ?
देशभक्ति नाराभन्दा बढी के छ र ?
इतिहास सम्झिएर गोर्खा शक्तिको
बलभद्र भीमसेन थापा भक्तिको
के काम भो छिमेकीको मान्दछौँ डर
देशभक्ति नाराभन्दा बढी के छ र ?
भाषा बोल्छौँ विदेशको भेष उतैको
चाड मान्छौँ आज हामी जतासुकैको
देश खोक्रो पार्न अरू के चाहिन्छ र ?
देशभक्ति नाराभन्दा बढी के छ र ?
नैतिकता गुमाउँदै देख्छु समाज
युवापिँढी देखिँदैछ निर्लज्ज आज
सस्तो लोकप्रिय बन्ने होड देखेर
देशभक्ति नाराभन्दा माथि – के छ र ?
नेताजीका भाषणमा मख्ख जनता
ताली ठोक्ने काम पायौ के छ भन त ?
पछारेर देशलाई चुम्छौ शिखर ?
देशभक्ति नाराभन्दा माथि – के छ र ?
पसिना जो किसानको झर्छ खेतमा
अन्न पुग्छ धनाड्यको घ्याम्पे पेटमा
पानी बोकी नआउनू मेघ असार
देशभक्ति नाराभन्दा माथि – के छ र ?
बलात्कारी खुला घुम्छन् चेली मर्दछन्
तिनैलाई जोगाउने नेता गर्दछन्
दिक्क लाग्छ अगुवाको चाला देखेर
देशभक्ति नाराभन्दा माथि – के छ र ?
नीतिगत भ्रष्टाचार मौलाएको छ
देश हाँक्ने चालक जो बौलाएको छ
सत्ता हाँक्छ नेपथ्यमा साथी बसेर
देशभक्ति नाराभन्दा माथि – के छ र ?
०००
मेचीनगर, झापा
हाल- बेलायत