नेपाली हास्यव्यङ्ग्य अनलाइन पत्रिका

मानो बुकायो र पाथी भरायो
भर्दै भकारी चकारी अघायो
सत्ता चलायो अहङ्कार छायो
आतङ्ककारी छ हर्रो चपायो ।१

के के लुकायो र खै के हरायो
हुङ्कार कस्तो छ घाँडो बनायो
ढोग्दै पराया छ मुर्दा जनायो
आतङ्ककारी छ हर्रो चपायो ।२

आगो लगायो र छानो डढायो
लाचार घाती कुवा पो खनायो
यी सम्पदाको त सातो उडायो
आतङ्ककारी छ हर्रो चपायो ।३

कालो न कालो छ ध्वाँसे सतायो
के के न राम्रो छु आफै बतायो
देखेन केही र खुम्रो लुकायो
आतङ्ककारी छ हर्रो चपायो ।४

चोरेर खायो र नाच्यो रमायो
जो धुन्धुकारी गुलामी जनायो
आमा रुवायो मलामी जनायो
आतङ्ककारी छ हर्रो चपायो ।५

नारा लगायो र उल्टो हिंडायो
जोगी र भोगी अगुल्टो चलायो
रोगी छ भाते छुरा पो चलायो
आतङ्ककारी छ हर्रो चपायो ।६

०००
चितवन