नेपाली हास्यव्यङ्ग्य अनलाइन पत्रिका

झुट्टो बोल्दिनँ
साचो बोलेको थाहा छैन
गर्दिनँ कहिल्यै भन्दिनँ
गर्नै आँटे
अर्को मजस्तोले गर्नै दिदैन
अरे म, म हुँ
म अर्कै खाले मान्छे हुँ ।

म यथास्थिति होइन
दहीचिउरे पनि होइन
यता मात्रै होइन
उता मात्रै पनि होइन
केन्द्रबिन्दुमा होइन
साच्चै भन्छु
कुर्सी जता, त्यता हुँ
म अर्कै खाले मान्छे हुँ ।

अचम्मको छु
आफ्ना छैनन्, भए पनि हुँदै होइनन्
पराय छैनन्
सिधान्त छ, छैन पनि
देश बनाउनु छ
भ्रष्टाचारीलाई समाउनु छ
अक्षरशः संविधानलाई कार्यन्वयन गर्नु छ
त्यसैले
प्रमुख मुद्दा कुर्सी हुन्छ
जसरी जम्नु छ
विश्वास अविश्वास हुन्छ
पक्ष विपक्ष हुँ
म अर्कै खाले मान्छे हुँ ।

कुरा सुशासनको होस्
मुटु भित्र देश र जनता होस्
आश्वासन बाँडेर तुर्दैन
परिस्थिति फेर्ने मन्त्र छन्
झोला बोकेर पछ्याइरहनु
माथि पुगेर तान्ने यन्त्र छन्
ढाँट्छु, ढाँटिनु हुन्छ
गल्ती मेरो होइन
ढाँटेर खानु र मर्नु एउटै भन्छु
विश्वास गर्नु हुन्छ , त्यसैले अघुवाई चल्छ
घर चल्छ, समुह चल्छ
खै कस्तो हुँ
म अर्कै खाले मान्छे हुँ ।

मसँग मिलोस् त्योसँग जुधोस्
भन्नेहरू छन्
आस्था, बिचार, वंश नमिलोस्
कुरो मिलोस्,
कति चौलानी उमाल्नु
बाक्लो दालको बेग्लै मजा छ ।

विरोधी धेरै छन्
देखेर थुक्निल्ने कतिछन्
पख् भन्छन् गर्दैनन् केही
विरोधी पनि जाती छन्
सोच्छु
खुट्टो तान्ने नआउन्
कुरो काट्ने जिब्रो नफट्फटाउन्
विकल्प किन चाहियो
चलाई राखेका छौँ अझै चलाउछौँ
क र ख को बीचमा अ चाहिएन ।

श्रीमतीको प्रिय, पछ्याउनेको हाय,
अरुको फटाहा हुँ
म अर्कैखाले मान्छे हुँ ।

०००
त्रियुगा नगरपालिका -११, संगमटोल
उदयपुर,