नेपाली हास्यव्यङ्ग्य अनलाइन पत्रिका

हलो जोत्ने दाजै जोत्न थाले कराए
अनौ ठोक्दा ठोक्दै थुक्न थाले बिराए
खिया लाग्ने फाली हेर्न थाले रमाए
लगाएको ताला खुल्न थाले डराए ।१

तमाशा के होला खेत बारी भराए
किरा फट्याङ्ग्राले चुस्त बाली सकाए
जरा काट्दै जाने हन्तकाली समाए
लगाएको ताला खुल्न थाले डराए।२

हिया सुक्दै जाँदा आँत पोल्यो कराए
हिलो डल्ला खेल्दै कुन् भकारी भराए
पखेराको पानी प्युन टाढा छ धाए
लगाएको ताला खुल्न थाले डराए ।३

जमानाले कोल्टे फेर्छ भन्ने हराए
लुटेराको धन्दा धुन्धुकारी जनाए
गरेकाछन् चोरी मूर्ख दाह्रा बुकाए
लगाएको ताला खुल्न थाले डराए ।४

सुकाएको माडा रुझ्न लाग्दा नआए
लुकाएको पैसा झिक्न आफै त आए
लगाएका नारा ठग्न हो यो बताए
लगाएको ताला खुल्न थाले डराए ।५

दलाली यो फन्दा हुन्छ कालो बताए
मलामीको खाना हुन्छ मार्सी अघाए
गुलामीको बाटो रोज्न टाढा सघाए
र ढोकाको ताला खुल्न थाले डराए ।६

०००
नवलपुर