होम सुवेदीसाइँला देशमा आइहाल्
भासिनु पर्ने भास कम भएको छ गाउँको त्रास माथितिरै गएको छ अब गारो छैन मात्र पार्टीको झोला बोक्नुपर्छ जे पनि दिन्छु भनेर भाषणमा खोक्नुपर्छ विरोधीलाई ठोक्नुपर्छ सकेसम्म तिनलाई रोक्नुपर्छ ।
होम सुवेदी :
साइँला,
ए साइँला
देशमा आइहाल्
साइँला,
अब अलि गम्भीर भएर
सोच विचार गर्
उ बेलाको जति अब
आतङ्क छैन गाउँमा
चन्दाआतङ्कहरूका आँखा
अब छन् ब्याजमा र साउँमा
गाउँ दुख गर्नु पर्ने हुनाले
पुगिसके अब गतिला ठाउँमा
यसैले-
अलिक कम भएको छ डर
मेसो मिलाएर अब फर्की घर ।
हेर् साइँला,
अपहरण अलि हटेका छन्
सुराकीको बहानामा
बेपत्ता पार्ने काम पनि
अलि घटेका छन्
गाउँमा आतङ्क मच्चाउने पनि
अब सहरतिरै खटेका छन्
ठुला माफियासँगै अटेका छन्
देश बनाउने काममा डटेका छन्
भने हेर् साइँला
अब विदेश नबस्
मेसो मिलाएर देशमै पस् ।
भैंसी ल्याका छन्
राँगा ल्याका छन्
देशमा भैंसी मात्र हैन
राँगा पनि ब्याका छन्
धेरै कुरा भ्याका छन्
आइहाल् साइँला
आइहाल् ।
हेर् साइँला
उबेलाका प्रभुका
रेस्टुराँ र बार खुलिसके
दरबारसँग पनि डर कम भो
कमरेटहरू पनि अब खुलिसके
रेस्टुराँतिर झुलिसके
वीराङ्गनातिर भुलिसके
बेला पनि भो नि त
अब फुलिसके ।
हेर् साइँला,
अब नगरेको कुरामा
भासिनु पर्ने भास
कम भएको छ
गाउँको त्रास
माथितिरै गएको छ
अब गारो छैन
मात्र पार्टीको झोला बोक्नुपर्छ
जे पनि दिन्छु भनेर
भाषणमा खोक्नुपर्छ
विरोधीलाई ठोक्नुपर्छ
सकेसम्म तिनलाई रोक्नुपर्छ ।
हेर् साइँला अब आइज
देशले तिमीहरू जस्ता
झोले युवक मागेको छ
तिमी जस्तो युवाको
जोस जागेको छ
देश उकालो लागेको छ
हेर् साइँला
छिटै देशमा आइहाल्
पार्टीको झोला समाइहाल् ।
०००
भद्रपुर, झापा
Subscribe
Login
0 Comments
Oldest
