नेपाली हास्यव्यङ्ग्य अनलाइन पत्रिका

होम सुवेदी :

जाँडदर्शनको आज भन्न लागेँ कुरा जडी
हरेक घरमा जस्तो जाँडका खन्ती छन् बढी ॥

कुथुङ्ग्री म बखान्दै छु अहिले रक्सी जाँडको
कुरा नै नगरौँ होला गृहका मन्त्री खाँडको ॥

जँड्याहाले कुरा गर्दा स्वर्ग पाताल फुर्दछन्
सर्वस्व तिनले बेची रक्सी जाँड हसुर्दछन् ॥

शुद्ध अन्न कुवाएमा पर्छन् सेता किराहरू
निचोरी त्यही नै खान्छन् धतुरे धमिराहरू ॥

जो ठान्छन् मान मर्यादा जाँड हो खास वैभव
हो, तिनै धतुरेलाई जँड्याहा भन्दछन् सब ॥

जाँडको चुस्की भेटेमा शत्रु नै पनि यार छन्
भातको गाँस छाडेर जाँड धोक्न तयार छन् ॥

मान्छे छन् भात छाडेर जाँड धोक्ने थरी थरी
जाँडैमा छाड्दछन् ज्यान बचाऊ अब हे हरि ॥

धोक्नै पर्छ सकेसम्म नखाऊ भन्नु के गरी
थोरै खान्थे कुनै बेला खाने हुन्थे अजम्मरी ॥

उपध्रो गर्दछन् भेटे जँड्याहा भतुवाहरू
धतुरो जाँग वा भाङ रक्सीले मतुवाहरू ॥

जता हुन्छ त्यतै ल्याप्चे सहजैसित थिच्तछन्
अरू बेच्ने कुरा छाडौँ छोरी बेचेर घिच्तछन् ॥

साटासाट गरी पत्नी जँड्याहाहरू सुत्तछन्
त्यस्तोमा प्रहरी आए तिनैले धोती मुत्तछन् ॥

जिब्रो लट्पटिने गर्छ खुट्टा झन् लर्बराउँछन्
जाँडभक्तहरू धेरै अङ्ग्रेजी बर्बराउँछन् ॥

पैसाको के कुरा गर्ने कनिकासरि छर्दछन्
जाँडका भक्तले नित्य फुपूको श्राद्ध गर्दछन् ॥

जाँडको झोल धोकेर राजा ठान्छन् भुरेहरू
संसारै वशमा मान्छन् जँड्याहा धतुरेहरू ॥

नयाँ धरहराबाट हाम फाल्ने झिकी सुर
बिहानै जाँडको घोडा चढ्छन् जङ्गबहादुर ॥

जाँडका सुरमा मान्छन् संसारै निजको घर
महाराज स्वयं ठान्छन् स्वयं बन्छन् धुरन्धर ॥

नहुँदा जाँडको घ्याम्पो देखिन्छन् अति काँतर
जाँडपानी जसै चढ्छ मान्छन् भव्य धनुर्धर ॥

पत्नीका गहना बेची घाँटी शीतल गर्दछन्
यो देखी धतुरे बाबा शिव नै दङ्ग पर्दछन् ॥

जाँडको सुरमा आफ्नो गोप्यता खोल्न थाल्दछन्
नेपाली बोल्न छाडेर अङ्ग्रेजी बोल्न थाल्दछन् ॥

कोरोनाबाट संसारै आज देखिन्छ थर्थरी
जाँडको झोलमा सिङ्गै हाम्रो देश बगेसरि ॥

जँड्याहा धतुरे हाम्रो नाङ्गो सर्कार बोल्दछ
दूध उद्योग छाडेर दारु उद्योग खोल्दछ ॥

यता रित्ता सबै पेट उता नाच नचाउँछन्
बाबु चाहिँ खरो पानी जाँड मात्रै अचाउँछन् ॥

जँड्याहा धतुरे सामु हल्लँदै जब आउँछ
नखाने मनुवालाई हस्स नर्क गनाउँछ ॥

०००
भद्रपुर, झापा