नेपाली हास्यव्यङ्ग्य अनलाइन पत्रिका

होम सुवेदी :

पोहोरजस्तै
यो वर्ष पनि
असार लागेको छ
पोहोरझैँ यो साल पनि
कृषिप्रधान देशमा
कृषिकर्म जागेको छ
कृषिप्रधान देशले
कृषिकर्म मागेको छ
हाम्रो कान्छो भने कृषिकर्म गर्न
मलेसियातिर लागेको छ
कान्छीलाई पनि
दुबै जाने भुत जागेको छ
देशले उद्योगधन्दा मागेको छ
यता बेँसी बाँझै छ त के भो
यहाँ खेत बाँझै छन् त के भो
विहारबाट धान मगाउँला
खाडीमा पैसा कमाउँला
अघाउँजी धानको भात खाउँला
असार लागेको छ
गमलामा रोपाइँको धुम छ
कौसीमा मकै फलाएर
बुम बुम छ
अहिले कृषि मन्त्रालयको उधुम छ
अधिकृतहरूलाई हतारो छ
धान रोप्ने चटारो छ
मन्त्रीलाई सारो छ
अतिथिमा आइजाइ छ
मन्त्रीलाई भ्याई नभ्याई छ

गमला तयार पार
असारे गीत बजाऊ
भारतबाट झिकाएर
दही चिउरा खाऊ
रमाइलो मनाऊ
मन्त्रीलाई बिउको माला लाइदेऊ
रोप्न चाहिने मल
पाक्ने बेलामा ल्याइदेऊ
आँखा उघार
जारको एक लोहोटा पानी
तयार पार
असार लागेको छ
बुद्धिको बिर्को उघार
काम गर्न अरब जाऊ
यहाँ खुट्टा पसार
देशमा केही भएन भनी
गोहीको आँसु झार
मन्त्रीको हाई हाई छ
असारको सिजन न पर्‍यो
मन्त्रीलाई भ्याई नभ्याई छ ।

०००
भद्रपुर, झापा