नेपाली हास्यव्यङ्ग्य अनलाइन पत्रिका

जगदीश्वर पोखरेल :

ढाँट्ने आदत छैन भाषण गरी उल्टा कुरा जान्दिन
जे भन्छन् जनता सुनेर म कसै गर्छू भनी भन्दिन
बोल्दा अर्थ अनर्थ लाग्दछ भने सम्झन्छु आफ्नै हित
झूटो सक्दिन बोल्न छैन क्षमता नेता नबन्ने म त ॥१

गुन्डा पाल्न सकिन्न लुट्न जनता व्यर्थै गयो जीवन
भ्रष्टाचार बजार थाप्न गतिलो गर्दैन क्यै चिन्तन
बन्दै यौन पिपासु लुट्न वनिता लागेन घाती लत
जे जे पर्दछ गर्न छैन क्षमता नेता नबन्ने म त ॥२

आमाको स्तन काट्न बेच्न कसिने आँटी नबन्ने जुनी
बन्लान् मर्द बलिष्ठ वास्तव उनै राख्छन् सबैले चुनी
लुट्ने देश अनित्य चिन्तन गरी बन्दै छ दुर्छे रत
जो चाहिन्छ सदैव छैन क्षमता नेता नबन्ने म त ॥३

रेट्ने तागत छैन बन्धु हितका छोरा र छोरी गुरु
ध्वस्तै पार्न विकास सक्छ जसले भो’ देशको आबरु
सत्ता हात लगाउँने खल बने सोझा बरा आहत
लुट्नै राष्ट्र सकिन्न छैन क्षमता नेता नबन्ने म त ॥४

भोका पेट चिरेर डाम्छ पनि यो रातो बनाई कन
खै आदर्श समाज योग्य युगको नेतृत्त्व गर्ने गण
खै सम्मान मान सान सकियो नेता बने घातक
घाती शासक बन्न छैन क्षमता नेता नबन्ने म त ॥५

०००
पाउँदीबजार, लमजुङ