नेपाली हास्यव्यङ्ग्य अनलाइन पत्रिका

दुर्गा रिमाल अधिकारी

तपाईं भारत र नेपाल बराबर गर्नुहुन्छ
नागरिकता पनि सराबर पार्नु हुन्छ
उताकाले दानापानी खुवाएपछि
नेपालीलाई पनि उतैको बनाउनु हुन्छ ।

स्वाभिमानको कुरा पनि गर्नुहुन्छ
आफ्नो देश उतैकालाई लुटाउनु हुन्छ
कहिले भारतको दाउपेच,
कहिले अमेरिकाको दाउपेच,
यो सबै नघिनाई स्विकार्नु हुन्छ ।

स्वभिमान बेच्न तपाइँलाई
खूब मजा लाग्छ
लिपुलेक, कालापानी पनि
उतैको हो कि जस्तो लाग्छ

भारतले हस्तक्षेप गरेको हैन
माया पो गरेको भन्नुहुन्छ
चलचित्र बनाउँदा पनि
नेपाल त भारतकै अङ्ग हो भन्छन्
तपाइँ पनि हो हो भन्नु हुन्छ ।

कुनै दिन महान् भारतको निगाहले
नेपालको राजधानी दिल्ली बन्ने हो कि
अरुलाई त दुःख लाग्ला
तपाइँ चाहिँ खूब खुसी हुनु हुन्छ ।

ए हाम्रा महान नेताज्यू !
छातीमा हात राखेर भन्नुहोस् त
तपाइँ यताको कि उताको हुनु हुन्छ ?
उतैकालाई पोषिलो र बलियो पार्न
यताको गाई किन दुहुनु हुन्छ ??

०००
कलङ्की- १४, काठमाडौं