नेपाली हास्यव्यङ्ग्य अनलाइन पत्रिका

मीनप्रसाद लामिछाने  :

आऊ एउटा सहमति गरौँ
अलिखित, अमूर्त र अव्यक्त
तर विशिष्ट, सशक्त र परिपक्क ।

तिमी मेरो तारिफ गर
म तिम्रो गर्छु
तिमी मेरा कुरामा रङ भर
म तिम्रा कुरामा बुट्टा भर्छु ।

तिमी मेरो छोरालाई छात्रवृत्ति मिलाइदेऊ
म तिम्रा काममा समर्थन जनाइदिउँला
तिमी मेरो सालोलाई ठेक्का दिलाइदेऊ
म तिम्रो ससुरालीको घर बनाइदिउँला ।

तिमी मेरो सदर गर
म तिम्रो कदर गर्छु
यसो गर्दा तिमीलाई नि कसैले शड़का गर्दैन
मैले पनि स्पष्टीकरण दिइरहनु पर्दैन ।

सिधा औंलाले घिउ आउँदैन
त्यसैले, तिमी औंला बङ्ग्याऊ
म खुट्टा घुमाउँछु
तिमी उच्च नैतिकताको कुरा गर
म समर्थन जनाउँछु ।

यसरी तिमी पनि व्यवहार मिलाऊ
म पनि केही कमाउँछु
किन कि
मैले आफैलाई दिन मिल्दैन
तिमीले नि आफैँसँग लिन मिल्दैन ।

तिमी मलाई सम्मान गर
म तिमीलाई खादा ओढाउँछु
तिमी मेरा लागि श्रोता तयार गर
म तिम्रा लागि दर्शक बढाउँछु ।

यसरी,
हाम्रो नाम पनि हुन्छ, दाम पनि हुन्छ
अरुले देख्दा काम पनि हुन्छ
तिमी मलाई प्रतिभावान् भन
म तिमीलाई निष्ठावान् भन्छु ।

त्यसैले,
आऊ एउटा सहमति गरौँ
अलिखित, अमूर्त र अव्यक्त
तर विशिष्ट, सशक्त र परिपक्क ।

तिमी मलाई क्याबात् ! भन
म तिमीलाई स्याबास् ! भन्छु
तिमी मेरो शुभेच्छुक बन
म तिम्रो समर्थक बन्छु ।

०००
हेटौँडा