नेपाली हास्यव्यङ्ग्य अनलाइन पत्रिका

रामशरण न्यौपाने :

पाङ्दुरेहरूको चर्चा हिजो आज छ देशमा
नाक ठाडोगरी हिँड्न साह्रै लाझ छ देशमा ।

अत्याचारी खुनीलाई तक्मा ताज छ देशमा
चराको हेर गोठालो कालो बाज छ देशमा ।

पाङ्दुरेहरू नै बस्छन् बनी सम्भ्रान्त केशरी
अत्याचार र अन्याय चारैतर्फ छ बेसरी ।

बल्यो शोषणको आगो जता हुर्केर व्यापक
सत्ताको फाँटमा चर्ने लिन्छन् दाम टकाटक ।

पाङ्दुरेहरू नै धेरै बने खुँखार शोषक
ऋण लागेर नेपाली मर्नथाले भकाभक ।

दलको पिँजरा भित्र बस्छे कानुनकी चरी
भत्ता तलवमा मात्रै पैसाको बग्छ निर्झरी ।

पाङ्दुरेहरू पार्टीको बनी दास दलाल नै
देशलाई थलापार्ने गर्छन् दुर्जन चाल नै ।

स्वार्थका वशमा हुन्छन् भएका सब निणर्य
फैसला छ सधैँ उल्टो जनता देशमा भय ।

पाङ्दुरेहरूको ज्यादा भान्छा चल्दछ देशमा
जनता छन् सधैँ भोका फस्ने नाहक केसमा ।

बुज्दैनन् दलका नेता कैल्यै देश र काल नै
सक्दैनन् देशको निम्ति घोटेर गाल्न दाल नै ।

पाङ्दुरेहरू तम्सिन्छन् चाकरी गर्न नै अति
राष्ट्रधात उनै गर्छन् बन्छन् बेकुफ दुर्मति ।

छैन आफ्नो निजी बुद्धि कार्यकर्ताहरू प्रति
भन्छन् चन्दन नेताले बिस्टा झारे पनि रती ।

०००
भक्तपुर