नेपाली हास्यव्यङ्ग्य अनलाइन पत्रिका

राजकुमार लामिछाने :

समय कस्तो आयो अचेल
जे गरे पनि भन्छन् स्टाईल
जसो गरे पनि हुन्छन् स्टाईल
थरिथरिका बन्छन् स्टाईल

कपाल कुरूप पारेर काटे पनि स्टाईल
विरूप पारेर बाटे पनि स्टाईल
बिभिन्न रङ दलेर रङ्ग्याए पनि स्टाईल
जता मन लाग्यो उतै बङ्ग्याए पनि स्टाईल
जिङ्गरिङ्ग पारेर ठड्याए पनि स्टाईल
नानाथरी केमिकल टासेर अड्याए पनि स्टाईल
समय कस्तो आयो अचेल
जसो गरे पनि हुने स्टाईल

कपडा पातला र छोटा भए पनि स्टाईल
बाक्ला र मोटा भए पनि स्टाईल
पिठ्युँ नाङ्गै भए पनि स्टाईल
शरीर उदाङ्गै भए पनि स्टाईल
सद्धे कपडा चिरेर लगाए पनि स्टाईल
लुन्द्रा र लुन्द्री भिरेर लगाए पनि स्टाईल
जमाना कस्तो आयो अचेल
जसो गरे पनि हुने स्टाईल

जुत्ता डिल भएको भए पनि स्टाईल
अग्लो हिल भएको भए पनि स्टाईल
तिखो चुच्चो भए पनि स्टाईल
केही नभएको बुच्चो भए पनि स्टाईल
शरीरमा टाटु खोपाए पनि स्टाईल
नानाथरी लेखाए पनि स्टाईल
युग कस्तो आयो अचेल
जसो गरे पनि हुने स्टाईल

कहिले त स्टाईलले पार्छ साह्रो
महिला र पुरूष छुट्याउनै गाह्रो
ए बहिनी ! भनेर बोलायो भाइ पर्छन्
चिन्दैनस् मानिस भनेर आँखा तर्छन्
समय कस्तो आयो अचेल
जे गरे पनि भन्छन् स्टाईल
जसो गरे पनि हुन्छन् स्टाईल
थरिथरिका बन्छन् स्टाईल ।

०००
हेटौडा