नेपाली हास्यव्यङ्ग्य अनलाइन पत्रिका

खगेन्द्र नेउपाने :

सम्माननीय राष्ट्रपति भन्नुहुन्छ
देशमा भ्रष्टाचार छ
सम्माननीय प्रधानमन्त्री भन्नुहुन्छ
देशमा भ्रष्टाचार छ
प्रतिपक्षी नेताले,
एताले तेताले सबैले भन्नुहुन्छ
देशमा भ्रष्टाचार छ
हैन, त्यो भ्रष्टाचार चैं बस्छ कहाँ ?

सुन्नु हुन्छ ?
त्यो भ्रष्टाचार कहाँ बस्छ ?
ल सुन्नुहोस्
भ्रष्टाचार इस्टिमेटमा छ
भ्रष्टाचार डि पि आरमा छ
भ्रष्टाचार खरिद बील बजेट र व्यापारमा छ ।
भ्रष्टाचार कमिसनमा छ
सेवग्राहीलाई अनावश्यक दुखदिने मिसनमा छ
नियम भूत देखाएर
साउनदेखि चैतसम्म झुलाउँने नियतमा छ
अधिकारीको इधर उधर कैफियतमा छ
पाइला पाइलामा छ भ्रष्टाचार ।

मेयर साबको कमजोरीमा छ
इन्धन तेल चोरीमा छ
एक चौथाई मात्र भ्याट तिर्ने व्यापारीमा छ
ठूला बडाको सवारीमा छ
ढिला सुस्तीमा छ
पक्ष प्रतिपक्षको कुस्ता कुस्तीमा छ
रिक्सा ठेलामा छ
देश विदेश यात्राको झमेलामा छ
पानीमा छ बिजुलीमा छ
तमर काबेली र त्रिसुलीमा छ ।
सबैको अङ्गालोमा
हर नदीको भङ्गालोमा
लुटको गीत विरुद्धको गालीमा
गालीको विरुद्ध बजाइएको तालीमा
हर गल्लीमा
सुनमा नुनमा
यत्र तत्र सर्वत्र छन भ्रष्टाचारकै धूनमा
घर घडेरी खेतीबारी
जोड्दै हिंड्छन् भ्रष्टाचारी

भ्रष्टाचार भन्सारमा छ
भ्रष्टाचार धन्सारमा छ
सडकको अलकत्रमा छ
योजनाको पत्रपत्रमा छ
त्यसैले
आदरणीय श्रद्धेय
नेतागण आफ्नू भाषणमा भन्नुहुन्छ
देशमा भ्रष्टाचार छ
तर
आफूतिर औँला फर्काइदिने कसले
भ्रष्टाचार अन्त्य गर्ने कसले ?

०००
गौरादह, झापा