नेपाली हास्यव्यङ्ग्य अनलाइन पत्रिका

रामशरण न्यौपाने :

काण्डै काण्ड छ माथमाथि सबको देखिन्न चोखो रती
दोषी गर्न करार सक्छ कसले? को दिन्छ खै सम्मति
जे गर्दा पनि आम माफ सजिजै पाइन्छ हो यस्तरी
प्यारो भो तब राजनीति दिलमा लाग्यो लिसो नै सरी ॥१

हत्याका घुसका तथा मनुजका सुक्री र बिक्री जुन
गर्दामा पनि माफ हुन्छ जति नै चोरीनिकासी सुन
भाग्छन् कानुन बिच्किएर सहसा आफैँ नमस्ते गरी
प्यारो भो तब राजनीति दिलमा लाग्यो लिसो नै सरी ॥२

उम्दा स्रोत सकिन्छ देश भरको आफन्त खोजी दिन
पोस्नैपर्दछ स्रोत प्राकृत सयौँ टेवा विदेशी लिन
पैसा मिल्दछ दस्तुरी अकुत त्यो खाता विदेशीभरि
प्यारो भो तब राजनीति दिलमा लाग्यो लिसो नै सरी ॥३

छन् उद्योग ठुला ठुला शहरमा सन्तानका नाममा
सोस्ने हो जनता र देश जसरी धक्का दिदै आममा
पर्दा देश विदेश तर्फ सजिलै जाइन्छ सौदा गरी
प्यारो भो तब राजनीति दिलमा लाग्यो लिसो नै सरी ॥४

बस्नैपर्छ अगस्ति देशभरका चुच्चो मिलाऊँ सब
सत्ताको धनको बराबर गरी हिस्सा दिलाऊँ अब
आफैँ बन्नु छ हो निरो मुलुकको सम्राट नै यस्तरी
प्यारो भो तब राजनीति दिलमा लाग्यो लिसो नै सरी ॥५

०००
भक्तपुर