नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
पीडक निर्दोष पीडित छ दोषी कस्तो अचम्म
रोपाईँ हिंसाको शान्तिको खोजी कस्तो अचम्म
चाला देखेर सरकारको अचेल यस्तो लाग्ने गर्छ
सर्पको इजलास भ्यागुतो आरोपी कस्तो अचम्म ।

२.
चढाउँदैमा चटकीले चढिदैन ढुक्कै हुनुस्
उठाउँदैमा उचक्काले उठिदैन ढुक्कै हुनुस्
उठ्ने झर्ने हुन्छ मान्छे मात्र आफ्नै कारणले
घटाउँदैमा घटियाले घटिँदैन ढुक्कै हुनुस् ।

३.
जता हेर्‍यो त्यतै बेइमानी र छल वाह मेरो देश
संविधानभन्दा माथि छन् नेता र दल वाह मेरो देश
देखियो तेरो अनुसन्धान अभियोजन पनि देखिएला
कारिन्दा, कसुरदार र मालिक गङ्गाजल वाह मेरो देश ।

४.
कामका हिसाबले महत्त्वको फलाम कि सुन होला
अँध्यारा बुकुराको सौन्दर्य टुकी होला कि जून होला
फेरि पाइँदैन तर किन आत्महत्या गर्दैछन् मान्छेहरू
मर्न बाध्य गराउने यो समाज कि काइते कानुन होला ।

०००
भैरहवा ।