रोहित दहालहाँसो उठ्न थाल्यो
राजा गयो, राजा जस्तै चरित्र चै रह्यो बाँदरको कुप्रे हातमा नारिवल पो भयो ! कोक, फेन्टा, बर्गरले गिदी चुस्दै फाल्यो खोक्रो टाउको देखी मलाई हाँसो उठ्न थाल्यो !!
रोहित दहाल :
भूपी शेरचन चिन्छयौ, नानी ? मैले गरें प्रश्न
उनले भनिन- यी कुरामा पर्नु छैन फँस्न !
पारिजातका कृति नानी, कति पढ्यौ तिम्ले ?
रणवीर कपुर को हो ? सोध्नु भनिन् उन्ले !!
जेठा हिजो भन्ने गर्थे- संस्कृति भो ध्वस्त
विदेश गको छोरोसँग आज भए मस्त !
ह्यापी बर्थ डे भन्दै जेठा, पडकाउँछन् ताली
भन्छन् उनी- केक विनाको जन्मदिनै झेली !!
खेती छोडी किसान बाजे बस्छन् शहरतिर
दुबईबाट पैसा आउँछ, अब छैन पीर !
बाँझो खेत, अन्न छैन विदेशतिर युवा
छोरो भन्छ सबै कुरा किनी खानु बुवा !!
राजा आउ देश बचाउ माइला लाउँछन् नारा
चप्पल लाउने धनी भए देश भाँडे सारा !
उनी भन्छन् राजा जस्ता सम्भ्रान्त पो जाती
लानहुन्न भन्छन् उनी भुइँमान्छेलाई माथि !!
स्मार्ट हुने, मोर्डन हुने साहिंलीको छ रहर
किताबहरू थन्क्याएर मोबाइल बोकी शहर !
आउँछिन् उनी टिकटक लाइभ, बाह्र बजे राति
ज्ञान छैन सीप छैन, समयको भो क्षति !
गाउँमूलीलाई सोधें मैले- किन भ्यु टावर ?
उनी भन्छन्- यै त हो नि, समृद्धि र पावर !
देशनाइकेलाई मैले सोधें- खै त युवा घरमा ?
उनी भन्छन्- क्या मज्जा छ रेमिटेन्सको भरमा !!
राजा गयो, राजा जस्तै चरित्र चै रह्यो
बाँदरको कुप्रे हातमा नारिवल पो भयो !
कोक, फेन्टा, बर्गरले गिदी चुस्दै फाल्यो
खोक्रो टाउको देखी मलाई हाँसो उठ्न थाल्यो !!
०००
विराटनगर, मुनालपथ
हालः दुवाकोट, भक्तपुर
Subscribe
Login
0 Comments
Oldest
