नेपाली हास्यव्यङ्ग्य अनलाइन पत्रिका

रोहित दहाल :

ऊ मक्किएको शास्त्र बोकेर आयो
मेरो आस्था मार्न
आस्था थियो सतिसाल
ऊ पराजित भयो ।

ऊ धागोको त्यान्द्रा बोकेर आयो
मेरो शरीरमा पहिर्‍याउन
शरीर शुद्रको भस्त्राले ओतप्रोत थियो
मनुवादले ग्वाँ गर्‍यो ।

ऊ पुनः ताम्रपात्रमा पानी बोकेर आयो
मेरो देहलाई शुद्ध पार्न
देह दमिनी वस्त्रले बेरेको थियो
उसको आचमन खेर गयो ।

अब त ऊ मेरै नाम बोकेर आयो
आफ्नो संस्कारको थालीमा
आफैले कर्मकाण्ड गरायो
मेरो नाममा ।
आफैँले वैतरणी पूजा पढायो
मेरो नामको गौदानमा ।

अर्को दिन हल्ला सुनेँ
चक्षु मल्दै उठेर हेरेँ
ऊ सडकमा चिच्याउँदै रहेछ
सतिसाल आस्था त ढालेरै छोडेँ ।

०००
विराटनगर ३, मुनालपथ, मोरङ
हालः दुवाकोट २, मिलनटोल, भक्तपुर