नेपाली हास्यव्यङ्ग्य अनलाइन पत्रिका

रोहित दहाल :

कानमा मुन्द्रा हातमा औंठी
बलियो छ छेपारी !
ढसमस्स बाटो छेकेर हिंड्छौं
झुक्दैनौं क्यै गरी !!

शिक्षक पिट्छौं, प्राध्यापक गोद्छौं
लाग्दैन उजुरी !
नेतागण हाम्रा झोलीका देउता
ढल्काउँछौं उदरी !!

कस्को छ आँट ? कस्को छ आँत ?
हामीलाई थर्काउने !
चुनावी चन्दा, मतपत्र कब्जा
हामीले हो गर्ने !!

देशका नाइके, राष्ट्रका पति
हाम्रा छन् दाहिना !
झ्यालखाना परे सँजाय माफी
हुँदैन हेलना !!

ठेक्का र पट्टा नेताका पैसा
हामीले चलाउने !
केही कालपछि चुनावी टिकट
हाम्ले नै पाउने !!

गुण्डाको नाइके चिनारी हाम्रो
संचार माध्यममा !
यो छवि राख्न हत्या र धम्की
गर्दछौं ट्याम ट्याममा !!

प्राज्ञिक व्यक्ति, इमान कर्मी
काम छैन देशमा !
चुनाव जित्ने हामी नै शक्ति
लुकेको भेषमा !!

पेशाले गुण्डा, टाउको मुन्डा
चौतर्फी हो–हल्ला !
अँध्यारो कोठा, साउती ओठ
दलसँग छ सल्ला !!

राजाका पालाँ तस्करी मुद्दा
दरबारले सल्ट्याउने !
नेताका ऐले श्यामल पैसा
हामीले पट्याउने !!

बातले हैन लातले हामी
निकाल्छौं सातपत्र !
संसदको चुनाव, पैसा र हुल्लड
हाम्रो यो बकपत्र !!

०००
विराटनगर ३, मुनालपथ, मोरङ्ग
हालः चाँगुनारायण २, दुवाकोट, भक्तपुर

कार्टुन : अनलाइन खबर