रोहित दहालम रैती बन्दै बन्दिन
देशको चुच्चे रेखाङ्कन हटाएर कालापानीमा वाह्य परेड खेलाएर झुठो राष्ट्रवादको श्रीपेच सजाउदिन कुरा बुझ, म रैती बन्दै बन्दिन
रोहित दहाल :
दश फुट ओर्तिरबाट दण्डवत गरेर
आधा फुट जति जिब्रो बाहिर पारेर
तिम्रो मौसुफलाई दाम चढाउदिन
कुरा बुझ, म रैती बन्दै बन्दिन
म जस्तै मनुवालाई अवतार मानेर
बक्सियोस् शब्दको अलंकार जोडेर
आफूलाई हीनतावोध गराउदिन
कुरा बुझ, म रैती बन्दै बन्दिन
व्यक्तिलाई कानुनभन्दा माथि ठानेर
उसका अपराधलाई ढाकछोप गरेर
कालो पदार्थलाई प्रसाद ठान्दिन
कुरा बुझ, म रैती बन्दै बन्दिन
कथित सम्राटको वंश स्याहारेर
उसको कुपुत्रलाई युवराज देखेर
आफ्नो नेत्रमा रतन्धो ल्याउदिन
कुरा बुझ, म रैती बन्दै बन्दिन
पुलिङ्ग मात्र उत्तराधिकारी सारेर
स्त्रीलाई वासनाको यन्त्र सोचेर
लैङ्गिक विभेदी संस्था भित्र्याउदिन
कुरा बुझ, म रैती बन्दै बन्दिन
हुकुम प्रमाङ्गीको शासन छानेर
जनसन्तान चुनिने बाटो छोडेर
आफ्नै हातपाउमा हत्कडी लाउदिन
कुरा बुझ, म रैती बन्दै बन्दिन
एकल धर्ममा मुलुक लपेटेर
निगाहमा बहुल धर्म दपेटेर
तिम्रो सम्राटलाई विष्णु बनाउदिन
कुरा बुझ, म रैती बन्दै बन्दिन
देशको चुच्चे रेखाङ्कन हटाएर
कालापानीमा वाह्य परेड खेलाएर
झुठो राष्ट्रवादको श्रीपेच सजाउदिन
कुरा बुझ, म रैती बन्दै बन्दिन
श्रम गर्नेलाई अछुतको दर्जा दिएर
स्वर्ग तार्ने पाखण्डलाई श्रद्धा गरेर
मनुवादी प्रारब्धमा श्री झुकाउदिन
कुरा बुझ, म रैती बन्दै बन्दिन ।
०००
(रोहित दहाल मार्क्सवादी कथाकार एवं लेखक हुनुहुन्छ ।)
आफु मालीक बन्न पाउने अधिकार लाई लत्याएर अरुको नोकर बन्ने राजसंस्था धारी मुलुकलाई आफ्नो बृता मान्ने बंश म ल्याउदै ल्याउदिन।