नेपाली हास्यव्यङ्ग्य अनलाइन पत्रिका

रोहित दहाल :

सर्वाहारा नारा बोक्छन्
नीति सम्भ्रान्तको !
समाजवादी भाषण गर्छन्
व्यवहार सामन्तको !!

संसदभित्र छिरेका छन्
कुरा क्रान्तिकारी !
सूट बूट चिल्ला गाडी
भए भ्रान्तिकारी !!

रातो झण्डा हल्लाउँछन्
तस्करसँग सेटिंग !
लेनिनका किताब राख्छन्
दलालसंग मिटिंग !!

उद्योग छैन निर्यात छैन
मजदूरको अभाव !
सिङ्गो देश हायलकायल
छैन युवा प्रभाव !!

स्वास्थ्य शिक्षा निजीकरण
समाजवादी खोकाई !
आफ्ना सन्तान विदेशतिर
क्रान्ति गर्ने भुकाई !!

नेपालको चुच्चे नक्सा
कुरा साह्रै चर्को !
विदेशसँग निगुरमुण्टी
राष्ट्रवादी बर्को !!

पुँजीवादी शासक भन्दा
फरक भएन कत्ति !
लवाई खवाई बानीहरू
उस्तै काट्टीकुट्टी !!

चुनावदेखि चुनावसम्म
संसदीय बाटो !
वर्तमान सत्ता प्यारो
मार्क्सवादको साटो !!

सिद्धान्तमा अविश्वासी
सस्तो वाचाबन्धन् !
संसदवादी कम्युनिष्टको
व्यक्तिवादी क्रन्दन !!

०००
विराटनगर ३, मुनालपथ, मोरङ
हालः दुवाकोट २, मिलनटोल, भक्तपुर