नेपाली हास्यव्यङ्ग्य अनलाइन पत्रिका

दिनेश पाण्डेय :

कतै भोकको मारमा छन् किसान
कसैमा सुनै मात्र सम्मान सान
जहाँ छैन ओछ्यानलाई घुसान
छ आकाशचुम्बी वहीँ आलिसान ॥

कसैको सदा बार्दलीमाथि बास
कसैमा भने थर्पुको छैन आस
बिनामासुको छैन काहीँ मिजास
कहीँ आँसुमै टर्दछन् चार गाँस ॥

बनी देशप्रेमी चहारेर दैलो
डुली गाउँका गाउँ खेलेर भैलो
चढी आज सत्ता तिमी न्याय मिच्छौ
डकारी डकारी स्वयं देश घिच्छौ ॥

यतै प्वाल पारी उतै प्वाल पारी
बिरालो बन्यो जाल थाप्ने सिकारी
भगाई मुसा ऊ स्वयं दङ्ग साथी
व्यथा राष्ट्रका सम्झिँदा दुख्छ छाती ॥

०००
०८०/०५/१३